თბილისის საბავშვო ბაღებში სააღმზრდელო პროცესი 15 სექტემბერს იწყება; მანამდე კი ბაღების დირექტორების ნაწილი მშობლებს წინასწარ ხვდება და როგორც etaloni.ge-ს რამდენიმე მათგანმა მიაწოდა ინფორმაცია, ბაღის ხელმძღვანელთა ნაწილმა პირდაპირ გამოუცხადა - თუ აღსაზრდელს საფენი უკეთია, დაწესებულებაში მის მიღებაზე უარი უნდა გითხრათ - ამ საკითხს შიდაგანაწესი არეგულირებსო.
საკითხის აქტუალობიდან გამომდინარე, დეტალების გასარკვევად, თბილისის ბაგა-ბაღების მართვის სააგენტოს მივმართეთ;საზოგადოებასთან ურთიერთობის სამსახურში გვიპასუხეს, რომ „პამპერსზე“ დამოკიდებული ბავშვის ბაღში მიღებაზე უარის თქმის უფლება ხელმძღვანელს არ აქვს:
„ბაღი საღმზრდელო-საგანმანათლებლო დაწესებულებაა; აქ ბავშვები საჭირო უნარ-ჩვევებს ითვისებენ და ჩვენი მოვალეობაა მათ განვითარებაზე ზრუნვა! აქედან გამომდინარე, იმის გამო, რომ ბავშვს პამპერსი უკეთია, მის მიღებაზე დირექტორი უარს ვერ იტყვის!“
