სააღმზრდელო პროცესი თბილისის ბაღებში 15 სექტემბერს განახლდა და როგორც ოფიციალურად გახდა ცნობილი, გარკვეული რეგულაციები შემსუბუქდა, თუმცა, როგორც etaloni.ge-მ გაარკვია, აღმზრდელები და ბაღის სხვა პერსონალი კვლავ ექვემდებარება სავალდებულო კოვიდტესტირებას.
საზოგადოებრივი ჯანდაცვის ცენტრის ხელმძღვანელის, ციცო დილებაშვილის განცხადებით, აღმზრდელები კვირაში ერთხელ უნდა დაიტესტონ; მიუხედავად იმისა, ჯერჯერობით ტესტების საჭირო რაოდენობა არ აქვთ, მალე მარაგი შეივსება:
„სკოლის მასწავლებლებისთვის კოვიდტესტირება გაუქმდა, თუმცა ბაღის აღმზრდელები აუცილებლად უნდა დაიტესტონ; იქიდან გამომდინარე, რომ არსებული პროტოკოლით, ინფიცირებულთან კონტაქტი იზოლაციაში აღარ გადადის, კოვიდტესტირების სრულად გაუქმება არასწორად მიგვაჩნია; ბაღის ბავშვებს პირბადეებს ვერ გავუკეთებთ და ეს ზომა, უსაფრთხოებისთვის საჭიროა“.
საზოგადოებრივი ჯანდაცვის ცენტრი, ასევე, ყველა აღმზრდელსა და მშობელს აფრთხილებს - ნებისმიერი სიმპტომის შემთხვევაში არ მივიდნენ სააღმზრდელო დაწესებულებაში, სხვაგვარად ბავშვებს ვერ დავიცავთ:
„სანამ ტესტების მარაგი შეივსება, მაქსიმალურად უნდა გავფრთხილდეთ ყველა; ჩვენ გავგზავნეთ რეკომენდაციები სააგენტოში და ისინი ბაღებს გააფრთხილებენ... არავითარ შემთვევაში, მშობელმა ბავშვი, თუმდაც მცირედი სიმპტომის გამოვლენისას, არ უნდა მიიყვანოს ბაღში... იგივე წესი ვრცელდება ბაღის პერსონალზეც“.
