ახალი რეკომენდაციები და მოსაზრებები სკოლამდელების გზამკვლევსა და მეთოდოლოგიურ დოკუმენტებში აისახება
განათლების ხარისხის განვითარების ეროვნული ცენტრის, ადრეული და სკოლამდელი აღზრდისა და განათლების ხარისხის უზრუნველყოფის სამსახურის ორგანიზებით ადრეული ან/და სკოლამდელი აღზრდისა და განათლების დაწესებულებების ავტორიზაციის პროცესის განხორციელების უზრუნველსაყოფად შექმნილი საკოორდინაციო ჯგუფის მორიგი შეხვედრა გაიმართა - ინფორმაციას აღნიშნული ცენტრი ავრცელებს.
როგორც განათლების ხარისხის განვითარების ცენტრი იტყობინება, შეხვედრაზე დამსწრე საზოგადოებას წარედგინა ბაღების ავტორიზაციის სტანდარტებით გათვალისწინებული მეთოდოლოგიური დოკუმენტების პროექტები, რომლებიც დაწესებულებების მხარდაჭერის ფარგლებში ცენტრის ინიციატივით შემუშავდა.
პირველ ეტაპზე განიხილეს 4 მეთოდოლოგიური დოკუმენტი:
► ავტორიზაციის პროცესის გზამკვლევი;
► სტრატეგიული დაგეგმვის მეთოდოლოგია;
► ბავშვთა ზღვრული რაოდენობის განსაზღვრის მეთოდოლოგია;
► ოჯახთან და თემთან კომუნიკაციის მეთოდოლოგია.